Sunday, March 16, 2014

ආදරයට වසරක් පිරුණා...

එයා ගැන ලියන බව කියල නම් දැන් ගොඩක් කල්. තාම ලියා ගන්න බැරි උනත් මේ වෙලාව තරම් ඒකට හොඳ වෙලාවක් තවත් නැතුව ඇති. ඒකට හේතුව තමයි අපේ ආදරයට වසරක් පිරෙන එක. ඔව්. හරියටම කිව්වොත් හෙට තමයි අපේ ආදරයේ පළවෙනි සංවත්සරය. ඉතින් එයා ගැන නොලියා කොහොමද.

ඇත්තටම අපේ ආදරේ බොහොම කෙටි කාලයක් තුළ බොහොම ඉක්මණින් ලියලා දලු ලා වැඩුණා කිව්වොත් නිවැරදියි. මුල්ම හමු වීම, SMS, පැය ගණන් මල් කැඩිලි, සති අන්ත හමුවීම්, ගෙවල් වලට කීම, ගෙවල් වලින් ආපු ප්‍රශ්න, ඒව ටික ටික විසඳ ගැනීම, එයා බලන්න ගෙදර අයත් එක්ක යාම, එයාගෙ ගෙදර අය අපේ ගෙදර ඒම, මේ ඔක්කොම ඉවර වෙලා දැන් ඉතින් දින නියම කරගන්න තැනටත් ඇවිත් තියෙන්නෙ.

"ගල් පර දැක පෙරමුණේ - මොන නදියද නැවතුණේ" කියන්නා වාගේ මොන බාධක ආවත් නොසැලුණු අපේ ආදරයේ පළමු වසර සැමරීම වෙනුවෙන්, සුදූ, මේක ඔයාටමයි ලිව්වේ.

ගැහෙන හදින් හමු වී අප
පිරුණු සිතින් සමු ගෙන ගිය
පළමු දිනය සිහි වේ අද වාගේ

අත් පටලා ඇවිදන් ගිය
නෙත් පටලා මිහිර වින්ද
මතක සපිරි පෙම අප දෙදෙනාගේ

අල්ලා ගත් අත කිසිදා
අත නොහරිමි යයි පෙරදා
පොරොන්දු වූ පරිදිම එක වාගේ

බලා සිටිමි දින ගනිමින්
අතැඟිලි බැඳ සුබ නැකතින්
කැන්දා ගෙන යන්නට නුඹ දීගේ


6 comments: